Prezidentlə görüşəndən sonra vətənə qayıtdı

“Baltika-2014” Beynəlxalq folklor festivalındakı çıxışından sonra Litva prezidenti Dalya Qribauskaytenin qəbulunda olan müğənni Kamil Cəfərov vətənə qayıdıb.


“Qafqazinfo”nun məlumatına görə, ifaçı festival haqda öz təəssüratlarını bölüşüb:

“Çox şadam ki, Azərbaycanı Litvada musiqi festivalında təmsil etdim. Ən yadda qalan çıxış bizim “Qarabağ muğam” qrupumuz oldu. Məni tarda Ramin Rüstəmov, kamançada İlxas Məmmədov müşayiət edirdi. Çıxışımızdan sonra Litvanın Mədəniyyət naziri, növbəti gündə isə Litva Prezidenti bizimlə görüşmək istədiyini söylədi. Litvanın prezidenti və biz də görüşdən məmnun qaldıq. O bizə sənət uğurları arzulayaraq, Azərbaycan musiqisini çox sevdiyini söylədi”.

Səfərdən qayıdan müğənni yaradıcılığında olan yenilikdən də söhbət açıb:

“Söz və musiqisi iş adamı Ruslan Ahmadoğluya, aranjemanı Eyyub Yəhyayevaya məxsus “Qayıt gəl” adlı mahnını lentə aldırmışam. Düşünürəm ki, bu bəstə də digər mahnılarım kimi seviləcək. Sözügedən mahnıya klip də çəkdirməyi düşünürəm”.

Qeyd edək ki, “Xalq ulduzu” yarışmasının yadda qalan iştirakçılarından olan Cəfərov xalq artisti Canəli Ələkbərovun tələbəsidir.



QafqazPRESS.az