Braziliyanın qırılmış beli: Neymar

Braziliyada keçirilən XX dünya çempionatı bir sıra ulduz oyunçular üçün çox uğursuz oldu. Əvvəl Uruqvay millisinin forvardı Luis Suares İtaliya ilə oyunda rəqibinin çiynini dişlədiyi üçün mundialdan qovuldu. Belçika ilə oyunda isə Argentina yığmasının aparıcı futbolçusu Anxel di Mariya zədələnərək sıradan çıxdı.

1/4 finalda Kolumbiya ilə matçın 87-ci dəqiqəsində isə mundialın ən yaxşı oyunçularından biri - Braziliya yığmasının hücumçusu rəqib futbolçunun kobud oyunundan sonra belindən ağır zədə alıb. Ayağa dura bilməyən gənc hücumçunu həkimlər xərəklə meydanın kənarına çıxarıblar. Braziliya yığmasının həkimi Rodriqo Lasmar deyib ki, Neymarın onurğasında sınıq aşkarlanıb: “O, əməliyyat olunmayacaq, ancaq bir müddət hərəkət edə bilməyəcək. Neymar bu zədə ilə futbol oynaya bilməz. Onun bir həftəyə sağalması mümkünsüzdür”.

Neymarın isə youtube şəbəkəsində videomüraciəti yayılıb.

Millinin məşqçi heyəti, futbolçular və azarkeşlərə müraciət edən gənc hücumçu qeyd edib ki, ən qısa zamanda yaşıl meydanlara qayıtmağa çalışacaq. “Siz mənim barəmdə az düşünən vaxt futbola dönəcəm. Hamıya mənə verdiyi dəstəyə görə təşəkkür edirəm. Mənim arzum - dünya çempionu olmaq istəyim hələ gerçəkləşməyib. Amma əminəm ki, komanda yoldaşlarım bunun üçün hər şeyi edəcəklər. Dünya çempionatının finalında oynamağı çox istəyirdim. Amma təəssüf ki, bu dəfə alınmadı. Hərçənd əminəm ki, qalib gələcəyik. Mənən komandamla birgə olacam və biz parlaq qələbəmizi birgə qeyd edəcəyik”, - deyə o bildirib.

Bu yazıda Braziliyanın ən yaxşı futbolçusu haqda ətraflı danışacağıq.

Neymar da Silva Santos Junior 1992-ci ilin fevral ayının 5-də Braziliyanın Moji-das-Kruzis şəhərində anadan olub. Neymarın atası və anası bahalı daş-qaş alveri ilə məşğul olub. Evin ilk uşağı olan Silvanın sonradan Rafaela adı verilən bir bacısı da dünyaya gəlib.
Neymar futbolçu kimi karyerasına 7 yaşında - 1999-cu ildə Braziliyanın yerli “Santos” klubundan başlayıb. Hələ “Santos”un əsas heyətində yer ala bilməyən Neymar San-Pauloda gənclər arasında keçirilən birincilikdə məşhurlaşmağa başlayır. Onun xüsusilə heyranedici driblinqləri-aldadıcı hərəkətləri futbol mütəxəssislərinin diqqətini cəlb edir. Ona bu texnikalı oyununa görə “yeni Robinyo” adlandırmağa başlayırlar.

Neymar hələ yeniyetmə yaşına çatmamasına baxmayaraq, dərhal Avropanın məşhur “Mançester-Siti”, “Real”, “Arsenal”, “Barselona”, “Çelsi” və “Milan” kimi klublarının menecerlərinin diqqətini çəkməyə başlayır.

12 yaşında o, “Real”ın akademiyasına qəbul edilir. Amma hələ uşaq olan Neymar valideynləri üçün darıxması səbəbindən vətənə qayıdır. Başqa bir məlumata görə, Neymarın Braziliyaya qayıtmasının səbəbi heç də darıxması olmayıb. Belə ki, “Santos” klubu Neymarın ailəsinə 1 milyon real ödəyərək “Real”dan doğma kluba qaytarıb.
2010-cu ilin yazında Neymar “Santos”un heyətində ilk çempionluğunu bayram edir. Aprelin 15-də Braziliya Kubokunun 1/16 finalında Neymar “Quarani” klubunun qapısına 5 qol vurur. Həmin il “Santos” Braziliya kubokunu da qazanır və Neymar da 11 qolla bombardirlər siyahısında birinci olur. Bu uğurlardan sonra Avropa klubları indi daha tez-tez Neymarı transfer etmək üçün əllərində müqavilə “Santos” rəhbərliyinin qapısına gəlirlər. Əvvəl “Vesthem Yunayted”in 15 milyon avroya transferi təklifinə “yox ” cavabı verilir. Bundan sonra “Çelsi”nin Neymar üçün 20 milyon avro təklifi də cavabsız qalır. “Çelsi” təklif edilən məbləği 26 milyona qaldırsa da, futbolçu “Santos”la müqaviləsini daha 5 il uzatmağa qərar verir. Neymar Avropa klublarının təklifindən imtinasını belə izah edirdi: “Yalnız pulla xoşbəxt olmaq mümkün deyil. ”Santos"un heyətində qalmağım doğru və müdrik qərardır".

2010-cu ilin sentyabrında isə Neymar əslində çox da müdrik qərar vermədiyini anlayır. Braziliya çempionatında “Santos”un baş məşqçisi Dopivala Juniora penalti zərbəsini vurmağı Neymara etibar etmədiyi üçün aralarında konflikt yaranır. Neymarın bu hərəkəti klub rəhbərliyinin qəzəbinə səbəb olur və hücumçu bir neçə oyun kənarlaşdırılaraq cərimələnir. Amma baş məşqçi bu cür cəzanın yüngül olduğunu dedikdən sonra özü komandadan kənarlaşdırılır.

2011-ci ilin iyununda Avropa klublarından Neymara yenidən təkliflər gəlməyə başlayır. Bu dəfə gənc braziliyalını “Çelsi” ilə yanaşı, “Yuventus”, “Barselona” və Rusiyanın “Anji” kimi klubları da transfer etmək üçün 45 milyon avro təklif edirlər. 2013-cü ilin 26 mayında “Barselona” öz saytında Neymarın kluba transfer edilməsi barədə xəbər yayır. “Marca” qəzeti isə bu transferin “Barselona” ya 57 milyon avroya başa gəldiyini xəbər verir. Tezliklə Neymar da öz tvitterində bu xəbəri təsdiqləyir. Neymar bu transfer müqaviləsi ilə Zlatan İbrahimoviçdən sonra “Barselona”nın tarixində ən bahalı oyunçu olur.
2013-cü il may ayının 3-də Neymar “Nou-Kampda” ilk oyununa çıxır. Braziliyalı “Barselona”nın heyətində ilk qolunu “Atletiko” ilə oyunda vurur. 2013-2014-cü il Çempionlar Liqasında “Seltik”lə oyunda Neymar üç qola imza ataraq “Barselona”nın heyətində ilk het-trikinin edir.

2010-cu ildə Braziliya futbolunun əfsanəvi ismi Pele Neymarın milli komandaya çağırılmasını tələb edir. CAR-da keçirilən dünya çempionatı ərəfəsi Neymarın milli komandaya götürülməsində tərəddüd edən baş məşqçi Dunqa onun adını heyətə salmır. Dünya çempionatından sonra nəhayət, Neymar Braziliya milli komandasının heyətində ABŞ-la qarşı ilk oyuna çıxır və qol da vurur. Həmin oyunda isə Neymar rasizmlə üzləşir. Tribunada olan almaniyalı turist ona banan atır...

Braziliyanın heyətində tezliklə əvəzedilməz hücumçuya çevrilən Neymar 2013-cü il Konfederasiya Kuboku yarışının ən yaxşı futbolçusu seçilir. Xatırladaq ki, Konfederasiya Kubokunun finalında Neymar İspaniyanın qapısına vurulan üç qoldan birinin müəllifi olub.
2014-cü il martın 5-də Neymar CAR-la oyunda yığmanın heyətində ikinci dəfə het-trik edir. CAR-ın qapısına vurulan 5 qolun 3-ü Neymarın adına yazılır.
Millinin heyətində Braziliya-Xorvatiya oyununda 50-ci oyununa çıxan Neymar mundialın ilk oyununda komandasının 2 topunu vurur. Kamerunla qrup mərhələsindəki oyunda da Neymar yenidən dubla imza atır.

İyulun 4-də Neymar Kolumbiya ilə görüşdə Xuan Suniqa ilə qarşılaşmada ağır zədə alaraq mundialdakı iştirakını erkən başa vurur.

Neymar inanclı adamdır və həftədə ən azı bir dəfə kilsəyə gedir. Futbolçu bununla bərabər həm də tez-tez xeyriyyə aksiyalarında iştirak edir. 2011-ci ildə “Santos”un heyətində hakimin səhvlərindən bezən Neymar tvitterində Sandro Meyra Riççini “oğru” adlandırdığı üçün məhkəməyə verilib. Neymar isə iddia edib ki, onun səhifəsini kimsə ələ keçirərək onun adından hakimin ünvanına təhqir yazıb.

Neymar 19 yaşında ata olub. Onun Karolina adlı rəfiqəsi isə ana olanda cəmi 17 yaşı varmış. Neymarın oğluna David Luka adı verilib. Neymar “Nike”, “Sony”, “Red Bull”, “Volkswagen” kimi tanınmış bredlərlə əməkdaşlıq edir. Neymar bahalı yaxta və avtomobillər həvəskarı kimi də tanınır.




QafqazzPRESS.az