Deputat: “Sürücü avtomobilini təyin olunan vaxtdan çox saxlayıbsa, cərimə yazılsın”

Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev Bakı Nəqliyyat Agentliyini (BNA) tənqid edib.
R.Quliyev deyib ki, BNA müsbət istiqamətdə bir neçə iş görüb, amma avtomobillərin dayanma-durması ilə əlaqədar yenə də böyük problemlər qalır.
“Bakının küçə və kvartallarında maşın saxlamaq müşkülə çevrilib. Çünki hər yerdə qadağalar mövcuddur. Qadağalarda isə maşını o ərazilərdə neçə dəqiqə saxlamaqla bağlı bir şey yazılmayıb. Sadəcə “olmaz”. Maşını o ərazilərdə saxlayan kimi BNA-nın işçiləri gəlib şəkli çəkirlər və 10 dəqiqə keçməmiş maşının sahibinə 20 manat cərimə olunması barədə mesaj gəlir”, - deyə deputat əlavə edib.
Deputat söyləyib ki, son bir ayda BNA-nın əməkdaşlarından başqa yol polislərinin eyni avtomobilin fotosunu çəkməsi də müşahidə edilir.
“Bu qədər şəkillər çəkilir, etirazım yoxdur. Elə sürücülər var ki, qaydaları pozurlar və onlar cəzasını almalıdır. Amma birinci olaraq şərait yaradılmalıdır ki, insanlar apteklərin, dükanların, bazarların qabağında rahat şəkildə avtomobillərini saxlayıb işlərini görsünlər. Bu məsələ bu günə qədər həll olunmayıb. Adamları qoyurlar ora, biri 50 qəpik alır, biri bir manat. Biri deyir BNA-nın işçisidir, biri deyir Bakı Şəhər İcra Hakimiyyətinin. Çek vermir və heç bir məsuliyyət daşımır. Biz xaricdə olanda görürük ki, orada istənilən şəhərdə xüsusi aparatlar var. Orada maşın saxlayan gəlib pulunu ödəyir və qəbzi alır, həmin qəbzi maşının qabaq şüşəsində yerləşdirir. Təklifim bundan ibarətdir ki, Bakının küçələrində eyni cür aparatlardan istifadə olunsun və insanlar maşın saxlamağa görə əziyyət çəkməsin. O qurğunun qiyməti olsun 500-700 dollar. Həmin cihazdan alıb quraşdırmaq lazımdır – çek də veriləcək və məsuliyyət də yaranacaq”, - deyən R.Quliyev onu da təklif edib ki, mərkəzdəki qiymətlər kənar ərazilərdə nisbətdə artıq olsun.
“Bu mexanizmi qurmaq nə böyük problemdir?! Bu, həm insanlara rahat olar, həm də büdcəyə pul gələr”, - deputat bildirib.
R.Quliyev xatırladıb ki, BNA-ya məktub yazıb və orada 7 sual qoyub. Üstündən 50 gün keçəndən sonra isə BNA deputatın müraciətinə cavab verir.
“Hiss edirəm ki, bu cavabların üzərində kifayət qədər güclü mütəxəssislər işləyib və çalışıblar ki, problemlərə qanuni don geyindirsinlər. Mən bir məsələni ciddi formada qoydum - BNA işçisi ilə sürücü münasibətləri nəyin əsasında tənzimlənir? Cavab yazılmışdı ki, həmin münasibətlər BNA-nın daxili təlimatları ilə tənzimlənir. Mən hüquqşünas deyiləm, iqtisadçıyam, polemikaya girmək istəmədim. Hiss edirəm ki, bəzi yerlərdə BNA dəyişiklik etmək istəyir, amma məsələ axıra çatdırılmır.
Mən isə yenə sualıma qayıdıram. Daxili təlimatlar həmin qurumun işçilərinə aiddir. Vətəndaşların hansısa qurumun işçisi ilə yaranan münasibətlərinin tənzimlənməsi isə fərqlidir. Bu sənədi ya Bakı Şəhər İcra Hakimiyyəti təsdiqləməlidir, ya da Nazirlər Kabinetinin xüsusi qərarı çıxmalıdır, ya da Milli Məclisin qəbul etdiyi qanun olmalıdır.
BNA mənə cavabının birində sürücülərin etiraz etməsinə şübhə ilə yanaşdığını bildirib. Açıb sosial şəbəkələrə baxmaq lazımdır, düzdür, sosial şəbəkələrdə bəzən düzgün olmayan məlumatlar da yayılır. Ancaq bu problemdən minlərlə insan şikayətlənir. BNA özü haqqında fikirləri görmək istəyirsə, sosial şəbəkələrə baxsın”.
Parlamentari təklif edib ki, problemlərin aradan qaldırılması üçün tezliklə addımlar atılmalıdır.
R.Quliyev deyib ki, hansısa deputat tənqidi fikir səsləndirəndə onun kimdənsə və ya hansısa qurumdan inciməyinə dair təsəvvür yaranmamalıdır:
“Bu, bizim problemlərin ümumi təzahürüdür. Hər şey qayda-qanunla, sivil qaydada tənzimlənməlidir. Bir çox küçələrdə kameralar quraşdırılıb, bunu alqışlayıram, insanların təhlükəsizliyi üçün vacibdir. Həmin kameralara baxaraq müəyyən edilməlidir ki, sürücü avtomobilini təyin olunan vaxtdan çox saxlayıb ya yox. Çox saxlayıbsa, cərimə yazılsın”.
Millət vəkili qeyd edib ki, onlarla deputat həmkarı onu dəstəkləyir.(oxu.az)