Bakıda avtobus qəzasında yaralananların adları açıqlandı

17:30

Bakıda sərnişin avtobuslarının iştirakı ilə baş vermiş qəza ilə əlaqədar cinayət işi açılıb.
Trend Bakı şəhər Prokurorluğu və Baş Polis İdarəsinin yaydığı birgə məlumata istinadən xəbər verir ki, iyunun 5-də saat 10 radələrində paytaxtın Nizami rayonu ərazisində Əliyev Elnur İlqar oğlunun idarə etdiyi 1 saylı marşrut xətti üzrə hərəkətdə olan "Daewoo" markalı sərnişin avtobusu, Əliyev Elnur Elman oğlunun idarə etdiyi 36 saylı marşrut xətti uzrə hərəkətdə olan "İsuzu" markalı sərnişin avtobusu və Həsənov Müşviq Zaur oğlunun idarə etdiyi "VAZ 2107" markalı avtomobil toqquşub.

Baş vermiş yol-nəqliyyat hadisəsi nəticəsində 36 saylı sərnişin avtobusunun sürücüsü Elnur Əliyev, həmin avtobusun sərnişinləri Tural Mehdiyev, Güloğlan Sultanov, Mirhəsən Babayev, Nail Mahmudov, Qurban Dəmirçiyev, Rasim Qəhrəmanov, Sehran Həsənova, Yeganə Bağırova və Əli Əlizadə müxtəlif dərəcəli bədən xəsarətləri alıblar.

Zərərçəkmişlərdən E.Əliyev, T.Mehdiyev, G.Sultanov və M.Babayev aldığı xəsarətlərlə bağlı xəstəxanaya yerləşdirilib, digərlərinə isə ilkin tibbi yardım göstərilərək evə buraxılıblar.
Faktla bağlı Nizami rayon Polis İdarəsinin İstintaq Şöbəsində Cinayət Məcəlləsinin 263.1-ci (Yol hərəkəti və nəqliyyat vasitələrinin istismarı qaydalarını pozma) maddəsi ilə cinayət işi başlanıb, müvafiq ekspertizalar təyin edilib və digər zəruri istintaq hərəkətləri yerinə yetirilib.
Hazırda iş üzrə istintaq davam etdirilir.

---------
12:26

Sabunçu rayon 3 saylı Klinik Xəstəxananın həkimi İlham Təmrazov yaralıların vəziyyəti barədə qafqazinfo-ya açıqlama verib. Həkimin sözlərinə görə, 9 yaralı xəstəxanaya yerləşdirilib. Onlardan üçünün vəziyyəti ağırdır. İkisi isə reanimasiya şöbəsindədir. Xəstələrdən biri şöbədə, 2-si ambulator müalicə alır.

O, yaralıların adlarını açıqlayıb:

Əlizadə Əli -1957-ci il

Sultanova Gülər

Əliyev Elnur -1979-cu il

Həsənova Seyran -1964-cü il

Mahmudov Nail- 1984-cü il

Dəmirçiyev Qurban- 1979-cu il

Mehdiyev Tural -1981-ci il

Qəhrəmanov Rəşid - 1992-ci il

----------
11:53

Bu gün səhər Bakıda baş verən iki sərnişin avtobusu toqquşması nəticəsində 12 nəfər xəsarət alıb.

Bakı Şəhər Təcili və Təxirəsalınmaz Tibbi Yardım Stansiyasının operativ işlər üzrə şöbəsinin böyük həkimi Zemfira Vahidova APA-ya açıqlamasında deyib ki, hadisə ilə bağlı təcili yardıma bu gün səhər 10:17-də çağırış daxil olub. Onun sözlərinə görə, "Qara Qarayev" metrosunun yaxınlığında baş verən qəzaya 8 təcili yardım briqadası göndərilib.

Ərazidə 1 və 36 saylı marşrut avtobuslarının toqquşması nəticəsində 12 nəfər xəsarət alıb.

Onların 2-nə yerində ilkin tibbi yardım göstərilib. Digər 10 nəfər isə xəstəxanalara yerləşdirilib. Xəstəxanaya yerləşdirilənlərdən 8-i kişi, 2-si isə qadındır.

Xəsarət alanların 8 nəfəri 3 saylı şəhər klinik xəstəxanasına, 2 nəfəri - ana və oğulun isə alt-üst çənə sınıqları olduğu üçün Kliniki Tibbi Mərkəzə çatdırılıb.

----------
11:42

Milli.Az-ın hadisə yerində olan müxbiri xəbər verir ki, hadisə nəticəsində xəsarət alanlardan üçü Sabunçu rayon 3 saylı xəstəxanaya yerləşdirilib.

İlkin ehtimala görə, qəzaya səbəb "VAZ-2107" markalı maşının işıqforda dayanması olub. Qırmızı işıqda saxlayarkən arxadan gələn 1 saylı avtobus "Jiquli"yə, 1 saylı avtobusun arxasınca gələn 36 saylı marşrut isə elə həmin avtobusa çırpılıb.

---------
11:37

Bu gün Bakıda baş verən iki sərnişin avtobusu toqquşması nəticəsində 12 nəfərin xəsarət aldığı məlum olub.

Bakı Şəhər Təcili və Təxirəsalınmaz Tibbi Yardım Stansiyasından anspress-ə verilən məlumata görə, qəza yerinə 10-a yaxın təcili tibbi yardım yardım briqadası göndərilib. Hadisə şahidləri isə yaralıların sayının 20-yə yaxın olduğunu bildirmişdilər.

---------
10:34

Bir neçə dəqiqə əvvəl metronun “Qara Qarayev” stansiyasının yaxınlığında ağır yol nəqliyyat hadisəsi baş verib.

Milli.Az aznews.az-a istinadən xəbər verir ki, 2 avtobusun toqquşması nəticəsində 15 nəfər xəsarət alıb.

Hazırda təcili yardım briqadaları hadisə yerinə cəlb olunublar.

Hadisə ilə bağlı əlavə məlumat verəcəyik.



QafqazPRESS.az