Ardadan transfer açıqlaması

“Atletiko Madrid”in aparıcı oyunçularından olan Arda Turan Türkiyədə istirahətdədir. Milli.Az apasport.az-a istinadən xəbər verir ki, futbolçu yerli telekanallardan birinə müsahibəsi zamanı transferi məsələsinə də toxunub.

Arda çox çətin mövsüm keçirdiklərini və dincəlmək istədiyini vurğulayıb: “Özümə vaxt ayırmağa ehtiyacım var. Beynim çox yorulub. Ölkəm üçün də darıxmışam. Bu mövsüm möhtəşəm oldu. İspaniya çempionluğunu yaşadıq. Çempionlar Liqasının finalında oynadıq. Amma əldən verdik. Hələ də yuxuma girir. Bu travmadan ayrıla bilmirəm. Lissabonu unutmuram. Belə şeylər olan zaman mənə dua edən türk xalqına təşəkkür edirəm. Mən ölkəmi təmsil etmək, Türkiyə bayrağını daşımaq istəyirəm. Bundan önəmli heç nə yoxdur”.

Arda transferi məsələsinin tam olaraq menecerinin ixtiyarında olduğunu bildirib: “Menecerim Əhməd Bulud mənə “belə bir təmasımız var. Amma sən işində ol” deyir. 2017-ci ilə qədər “Atletiko” ilə müqaviləm var. Çempion olduq, Çempionlar Liqasının finalında oynadıq. Amma bu məsələ ilə bağlı məlumat almaq istəyən varsa, Əhməd Buluda müraciət etsin. Təkcə mənə deyil, klubumuzun bütün üzvlərinə təkliflər var. Mənim üçün ən önəmli şərt xoşbəxt olmaqdır. Mən çox sevdiyim şeylərdən xoşbəxt olmadığım üçün ayrıldım”.

Futbolçu “Qalatasaray”a dönmək ehtimalından da danışıb: “Bir gün geri dönmək qərarı versəm və məni qəbul etsələr, xoşbəxt olaram. O zaman ailə, gələcəklə bağlı şərtlər necə olacağını bilmirəm. Biz professional futbolçular sabah nə olacağını bilmirik. Amma “Qalatasaray” mənim sevgimdir”.



QafqazPRESS.az