"Boney M" Binədə konsert verdi

Dünyaca məşhur "Boney M" qrupu ötən gün Binə qəsəbəsində yerləşən atçılıq klubunda möhtəşəm konsert proqramı ilə çıxış edib.

ANS PRESS-in məlumatına görə, ümummilli lider Heydər Əliyevin xatirəsinə həsr olunan Azərbaycan respublikasının Atçılıq Federasiyasının təşkilatçılığı ilə Binə qəsəbəsində yerləşən atçılıq klubunda atçılığın konkurs növü üzrə CSI3* kateqoriyalı beynəlxalq turnir keçirilib.

Gecə saatlarına qədər davam edən möhtəşəm günün əsas qonaqları isə dünyaca məşhur və əfsanəvi "Boney M" qrupunun konserti olub. Ard-arda olaraq sevilən mahnılarını ifa edən qrup üzvləri onları izləməyə toplaşan tamaşaçıları Azərbaycan dilində salamlayıblar. Meydançaya toplaşan yüzlərlə gənc əfsanəvi "Boney M" qrupunun canlı ifaları sədası altında dayanmadan rəqs ediblər. Konsert proqramının sonunda isə möhtəşəm atəşfəşanlıq olub.

Qeyd edək ki, bütün baş verənlərdən sonra qrup üzvləri media nümayəndələrini ətraflarına yığaraq mətbuat konfransı keçiriblər. Jurnalistlər ilə zarafatlaşan, səmimi dialoq aparan qaradərili ifaçılar Azərbaycanı çox sevdiklərini bildiriblər. Bundan əlavə olaraq onları dinləməyə gələn hər kəsə təşəkkürlərini bildiriblər və bir daha paytaxtımızın qonağı olmaq istədiklərini dilə gətiriblər.


QafqazPRESS.az