Aydın Mirzəzadə: "Onlar üçün Ermənistan düşmən deyil"

“Təəssüf ki, müstəqil Azərbaycan dövlətində bu gün milli maraqlara öz şəxsi prizmasından baxan müəyyən qruplar var. Onlar üçün Ermənistan düşmən deyil və Azərbaycanın beynəlxalq aləmdə imici heç bir əhəmiyyət daşımır”.

Milli.Az bidlirir ki, bu fikirləri SİA-ya açıqlamasında Yeni Azərbaycan Partiyası (YAP) Siyasi Şurasının üzvü, millət vəkili Aydın Mirzəzadə Sülh və Demokratiya İnstitunun (SDİ) Bakı ofisinin rəhbəri Leyla Yunusun və Arif Yunusun xarici səfirlik nümayəndələrinin dəstəyi ilə ölkəni tərk etmə cəhdlərinə münasibətini açıqlayarkən deyib.

Aydın Mirzəzadə vurğulayıb ki, onlar xaricdən mənbəyi şübhəli olan fondların qrantları ilə ölkəmiz haqqında mənfi imic yaradan layihələr həyata keçirməklə yanaşı, düşmən ölkə ilə birbaşa əlaqələr quraraq, ölkə vətəndaşlarını bu işlərə hərtərəfli cəlb etməyə çalışırlar: “Şübhəli fəaliyyətlərini xalq diplomatiyası adı altında pərdələməyə çalışırlar. İfşa olunduqları zaman ictimai qınağa tuş gələndə isə şou düzəldərək beynəlxalq ictimaiyyəti aldatmağa çalışırlar. Hesab edirəm ki, bu qəbildən olan addımlar heç bir halda cəmiyyətdə qəbul edilə bilməz”.

Millət vəkili, eyni zamanda qeyd etdi ki, xarici ölkə səfirlikləri hər hansı bir qurumların ya da fərdlərin vəkilləri rolunda çıxış etməməlidirlər: “Xarici ölkə səfirlikləri də bu tip qrupların fəaliyyətlərinin nədən ibarət olduğunu yaxşı anlayırlar. Səfirliklər nə mühafizə idarəsi, nə də vəkillər kollegiyasıdır! Hər bir vətəndaş etdiyi əmələ, söylədiyi fikrə görə məsuliyyət daşımağı bacarmalı, ilk növbədə, dövlət qarşısında hesabatını verməlidir”.


QafqazPRESS.az