Darmadağından sonra: Qurban Qurbanov, bağışla bizi...

Braziliya millisinin dünya çempionatının yarımfinalında ağır məğlubiyyəti çoxları üçün gözlənilməz oldu. "Alman maşını"nın bu dəfə də əzib-keçəcəyinə proqnoz verənlər də az deyildi. Ancaq məğlubiyyətin Braziliya üçün bu qədər ağır olacağını heç kim proqnozlaşdıra bilməzdi.

Ötən gecəyə qədər dünyada bir mif dolaşırdı. Ən yaxşı yığmanın Braziliya yığması olduğunu deyirdilər. Bu ölkədə keçirilən çempionatın hətta Avropa ölkələrindəki liqalardan da maraqlı olduğunu deyirdilər. Futbol Kralının vətəni haqda çox əfsanələr dolaşırdı.

Bütün dünyanın İspaniya, İngiltərə çempionatındakı oyunları izlədiyi, "Barselona", "Real" Madrid, "Mançester Yunayted", "Çelsi", "Liverpul" kimi klublara azarkeşlik etdiyi bir vaxtda qədim qitənin şimalında bir "nəhəng" yetişdiyindən hər kəs xəbərsiz idi. Sözsüz ki, Almaniyanın dərin futbol ənənələri var. Lakin son illər nədənsə kənarda qalırdı. Bütün ölkələrin televiziyaları Almaniya çempionatındansa İngiltərə və İspaniya liqalarını yayımlayırdılar. Ancaq ötən gecə dünya çempionatının yarımfinalında gözlənilməz hadisə baş verdi. Dünyanın ən güclü 4 yığmasından biri artıq 1-ci hissədə qapısından 5 qol buraxdı. Birinci hissədə Almaniya yığma komandası Braziliya üzərində qələbəsini tam təmin etdi. Oyun 7-1 almanların qələbəsi ilə başa çatdı.

Bəndəniz futbol həvəskarı deyil. Heç vaxt da gecə yuxusuna haram qatıb futbola baxmayıb. Ancaq kənardan prosesləri müşahidə edən insan kimi deyə bilərəm ki, Almaniya artıq dünyanın futbol krallığına çevrilib. Bunu iki il öncə Çempionlar Liqasında da təsdiq etdi. Heç kimin gözləmədiyi halda "Borussiya" (Dortmund) klubu Madrid "Real"ını, "Bavariya" isə "Barselona"nı əzib keçdi. Çempionlar Liqasında alman finalı keçirildi.

Almaniya-Braziliya oyunundan sonra "Qarabağ"ın da Almaniyanın "Ayntraxt" klubu ilə qarşılaşması yada düşdü. Bir il öncə "Qarabağ"ı məğlubiyyətə görə qınayırdım. Hətta mətbuat konfransında Qurban Qurbanova verdiyim sualda da bu qınağı çatdırmışdım. Baş məşqçinin "bu alman klubudur" - deyə bəraət cəhdlərini də qəbul etməmişdik. Ancaq Braziliya öz məğlubiyyəti ilə göstərdi ki, biz heç də pis deyilik.

P.S. Qurban müəllim, alman klubunun öz meydanında "Qarabağ"ın vurduğu bir qola görə sizə təşəkkür edirəm.



QafqazPRESS.az