» » Qanunsuz tikililərlə bağlı ciddi xəbərdarlıq

Qanunsuz tikililərlə bağlı ciddi xəbərdarlıq

Müəllif: Sevinc Novruzova
//
Tarix: 08 iyul 2014
//
Bölmə: Təhsil / Sosial
Qanunsuz tikililərlə bağlı ciddi xəbərdarlıq




13:53

Azərbaycan hökuməti qanunsuz tikililərlə bağlı tədbirlər görəcək. Trend-in məlumatına görə, bunu jurnalistlərə açıqlamasında baş nazirin müavini Abid Şərifov deyib.

A.Şərifov bildirib ki, yaxın bir-iki ay ərzində bununla bağlı müvafiq qərarın qəbul ediləcəyi gözlənilir: "Bir neçə ay ərzində istər Bakıda, istərsə də respublikanın ayrı-ayrı bölgələrində evlərin və digər qanunsuz obyektlərin tikintisinə qarşı daha ciddi tədbirlər görməyi düşünürük".

Baş nazirin müavininin sözlərinə görə, elə yerlər var ki, vətəndaş məsələn oranın sürüşmə zonası olub-olmadığını bilmir. Lakin ona orada torpaq verilir: "O adam da başlayır həmin yerdə nəsə tikməyə. Bir müddət sonra isə orada hansısa səbəbdən sürüşmə baş verir və nəticədə həmin adamın xərci də batır. Bununla da biz vətəndaşlarımıza bilərəkdən və yaxud bilməyərəkdən problemlər yaradırıq. Kürün və digər çayların hövzəsində, selə qarşı tədbirlər görülən yerlərdə, kommunukasiyaların üzərində, yüksək gərginlikli elektrik xətlərinin altında, qaz borularının üzərində evlərin tikilməsi üçün rəsmi və qeyri-rəsmi icazələrin verilməsi hallarına rast gəlmək olar. Yəqin ki, yaxın aylarda bu insanların təhlükəsizliyinin qorunması məqsədilə tədbirlərin görülməsi məsələsinə baxılacaq".

A.Şərifov bildirib ki, ayrı-ayrı dövlət qurumlarında bəzi şəxslər qanunları lazımi səviyyədə bilmir və ya öyrənmir: "Elə götürək bələdiyyələri. Bələdiyyələrdə torpağı necə paylamaq və tikintiyə necə icazə verməklə bağlı çoxlu səhvlər var. Lakin biz bunun qarşısını almalıyıq. Çünki bu qanunsuzluqların sonu görünmür. Bunun qarşısını almaq üçün isə ilk növbədə istər vətəndaşları, istərsə də məmurları maarifləndirməliyik. Təəssüflər olsun ki, biz maarifləndirmə işləri ilə kifayət qədər məşğul olmamışıq".

Onun sözlərinə görə, istər Bakıda olsun, istərsə də başqa bölgələrdə evlər hansısa yol çəkilməsi və digər layihələrin həyata keçirilməsi ilə əlaqədar söküntü zonasına düşürsə, onlara mütləq kompensasiya verilir: "Əgər bu insanlar burada uzun müddət yaşayırlarsa, onların sənədi varsa da, yoxsa da heç bir sənəd istənilmədən onlara kompensasiya ödənilir. Metro tikintisi ilə bağlı "Dərnəgül"dən yüzlərlə ailəni, Hərbi Hospitaldan 200-dən çox ailəni, yaxud da "Sovetski" deyilən məhəllədən və digər onlarla misal çəkə biləcəyim yerlədən insanları köçürdük. Bu, dövlət başçısının göstərişidir. İnsanlar burada yaşayıbsa və hansısa səbəblərdən sənədləşmə yoxdursa, insanları incitmək olmaz".

----------
12:40

“Azərbaycan hökuməti qanunsuz tikililərlə bağlı tədbirlər görəcək”.
APA-nın məlumatına görə, bunu jurnalistlərə açıqlamasında baş nazirin müavini Abid Şərifov deyib.

Onun sözlərinə görə, yaxın bir-iki ay ərzində bununla bağlı müvafiq qərarın qəbul edilməsi gözlənilir: “Hazırda biz bu məsələyə baxırıq. Qanunsuz tikililər ciddi problem olaraq qarşımızda dayanır”.

A.Şərifov qeyd edib ki, vətəndaşlar sürüşmə zonasında, yüksək gərginlikli elektrik xətlərinin altında və qaz kəmərlərinin yaxınlığında torpaq alıb, ev tikirlər: “Sonra bu problemlər meydana çıxır, təhlükəli vəziyyət yaranır. Belə hallar həm bölgələrdə, həm də Bakıda mövcuddur. Onu deyə bilərəm ki, biz bir neçə ay müddətində həm Bakıda, həm də bölgələrdə qanunsuz tikililərin inşasına qarşı daha ciddi tədbirlər görməyi düşünürük”.

Baş nazirin müavini tədbirlər planının nədən ibarət olacağını açıqlamayıb. O, əlavə edib ki, tədbirlər planı vətəndaşların təhlükəsizliyinin təmin edilməsi məqsədi daşıyır.




QafqazPRESS.az